ಹೊಸ ವಾಟ್ಸಪ್ ಸೈಬರ್ ಅಪರಾಧಗಳ ಬಗ್ಗೆ ತಿಳಿಯಿರಿ

ಭಾರತದಲ್ಲಿ 600 ಮಿಲಿಯನ್ ಗೂ ಹೆಚ್ಚು ವಾಟ್ಸಾಪ್ ಬಳಕೆದಾರರಿದ್ದಾರೆ, ಅಂದರೆ ದೇಶದ ಜನಸಂಖ್ಯೆಯ ಸುಮಾರು ಮೂರನೇ ಒಂದು ಭಾಗದಷ್ಟು ಜನರು ಇದನ್ನು ಬಳಸುತ್ತಿದ್ದಾರೆ. ಈಗೀಗ ಸೈಬರ್ ವಂಚಕರು ವಾಟ್ಸಾಪ್ ಮೂಲಕ ಜನರನ್ನು ಮೋಸಗೊಳಿಸುವ ಹೊಸ ಹೊಸ ತಂತ್ರಗಳನ್ನು ನಿರಂತರ ಕಂಡುಕೊಳ್ಳುತ್ತಿದ್ದಾರೆ. ನಾನು ಈ ಹಿಂದೆ ವಾಟ್ಸಪ್ಪ್ ಅಂತಾರಾಷ್ಟ್ರೀಯ ಕರೆ ವಂಚನೆಯ ಬಗ್ಗೆ ನಿಮಗೆ ತಿಳಿಸಿಕೊಟ್ಟಿದ್ದೆ. ಈ ಅಂಕಣದಲ್ಲಿ ನಾನು ನಿಮಗೆ ವಾಟ್ಸಪ್ಪ್ ಬಳಸಿ ನಡೆಸುವ ಕೆಲವು ಪ್ರಮುಖ ಸೈಬರ್ ಅಪರಾಧಗಳ ಬಗ್ಗೆ ತಿಳಿಸಿಕೊಡಲಿದ್ದೇನೆ.

ವಾಟ್ಸಪ್ಪ್ ಬಳಸಿ ನಡೆಸುವ ಪ್ರಮುಖ ಸೈಬರ್ ಅಪರಾಧಗಳು :-

• ಸಹಾಯದ ಹೆಸರಲ್ಲಿ ನಡೆಸುವ ಅಪರಾಧಗಳು : ಇಲ್ಲಿ ನಿಮಗೆ ನಿಮ್ಮ ಬಂದುಗಳ ಅಥವಾ ಸ್ನೇಹಿತರ ನಕಲಿ ಅಥವಾ ಹ್ಯಾಕ್ ಮಾಡಿರೋ ವಾಟ್ಸಾಪ್ ಅಕೌಂಟ್ ನಿಂದ ತಾವು ಒಂದು ಅಪಘಾತಕ್ಕೆ ತುತ್ತಾಗಿದ್ದೇನೆ ಅಥವಾ ಆಸ್ಪತ್ರೆ ಬಿಲ್ ಕಟ್ಟಕ್ಕೆ ಅಂತಾನೋ ಅಥವಾ ಬೇರೇನೋ ಕಾರಣ ಕೊಟ್ಟು ನಿಮ್ಮಿಂದ ಹಣಕ್ಕೆ ಬೇಡಿಕೆ ಮಾಡುವ ಮೆಸೇಜ್ ಬರುತ್ತದೆ. ನೀವೇನಾದರು ನಂಬಿ ಹಣ ಕೊಟ್ಟರೆ ಅದು ಸೈಬರ್ ಅಪರಾಧಿಗಳ ಅಕೌಂಟ್ಗೆ ಹೋಗುತ್ತದೆ ಮತ್ತು ಅವರು ನೀವು ಹಣ ಕೊಡುವುದನ್ನು ನಿಲ್ಲಿಸುವ ತನಕ ವಿವಿಧ ಕರಣ ಕೊಟ್ಟು ಇನ್ನು ಹೆಚ್ಚು ಹಣಕ್ಕೆ ಪೀಡಿಸುತ್ತಾರೆ.
• ಗಿಫ್ಟ್ ಕಾರ್ಡ್ ವಂಚನೆಗಳು : “ನೀವು ಲಕ್ಕಿ ಡಿಪ್ ನಲ್ಲಿ ಹಣ ಅಥವಾ ಯಾವುದೊ ಆಕರ್ಷಕ ವಸ್ತು ಗೆದ್ದಿದ್ದೀರಾ, ಅದನ್ನು ಪಡೆಯಲು ಕೆಳಗೆ ಸೂಚಿಸಿದ ಲಿಂಕ್ ಕ್ಲಿಕ್ ಮಾಡಿ ನಿಮ್ಮ ಮಾಹಿತಿ ನೀಡಿ” ಎಂದು ಒಂದು ನಿಮಗೆ ವಾಟ್ಸಪ್ಪ್ ಮೆಸೇಜ್ ಬರುತ್ತದೆ. ನೀವು ಕುತೂಹಲದಿಂದ ಏನಾದರೂ ಆ ಲಿಂಕ್ ಕ್ಲಿಕ್ ಮಾಡಿದ ಕೂಡಲೇ ನಿಮ್ಮ ಸ್ಮಾರ್ಟ್ ಫೋನ್ ಅಥವಾ ಕಂಪ್ಯೂಟರ್ ಮಾಲ್ವೇರ್ ದಾಳಿಗೆ ತುತ್ತಾಗುತ್ತದೆ ಮತ್ತು ಅದನ್ನು ಬಳಸಿ ಸೈಬರ್ ಖದೀಮರು ನಿಮ್ಮ ಮಾಹಿತಿಯನ್ನು ಕದ್ದು ನಿಮ್ಮ ಮೇಲೆ ವಿವಿಧ ಸೈಬರ್ ಅಪರಾಧಗಳನ್ನು ಎಸಗುತ್ತಾರೆ.
• ಪರಿಶೀಲನಾ ಕೋಡ್/ ವಾಟ್ಸಾಪ್ ಹ್ಯಾಕ್ ಹಗರಣ : ಇದು ನಿಮಗೆ ಸತತ ಎರಡು ಸಂದೇಶಗಳು ಬರುವುದರೊಂದಿಗೆ ಪ್ರಾರಂಭವಾಗುತ್ತದೆ. ಅಪರಿಚಿತರು ನಿಮಗ್ ಕರೆ ಮಾಡಿ ಆಕಸ್ಮಿಕ ತಪ್ಪಿನಿಂದಾಗಿ ನಾನು ನಿಮ್ಮ ಫೋನ್ ನಂಬರ್ ಗೆ ನನಗೆ ಬರಬೇಕಾದ ಕೋಡ್ ಬಂದಿರುತ್ತದೆ, ದಯಮಾಡಿ ಅದನ್ನು ನನಗೆ ಕೊಡಿ ಎಂದು ಏನೋ ಒಂದು ನಂಬುವಂಥ ಕಥೆ ಹೇಳುತ್ತಾರೆ. ನೀವು ನಂಬಿ ಆ ಕೋಡ್ ಅನ್ನು ಹಂಚಿಕೊಂಡರೆ, ಅದನ್ನು ಬಳಸಿ ನಿಮ್ಮ ವಾಟ್ಸಪ್ ಖಾತೆಯನ್ನು ಹ್ಯಾಕ್ ಮಾಡಲಾಗುತ್ತದೆ. ಬಳಿಕ ನಿಮ್ಮ ಸ್ನೇಹಿತರಿಗೆ ಸಂದೇಶ ಕಳುಹಿಸಿ, ವೈಯುಕ್ತಿಕ ಮಾಹಿತಿ ಹಂಚಿಕೊಳ್ಳಬಹುದು ಅಥವಾ UPI ಪಾವತಿ ಮೂಲಕ ಅವರ ಖಾತೆಗಳಿಗೆ ಹಣ ಹಾಕಿಸಿಕೊಳ್ಳಬಹುದು. ಒಂದು ಬಾರಿ ನಿಮ್ಮ ವಾಟ್ಸಾಪ್ ಹ್ಯಾಕಿಂಗ್ ಆದರೆ, ನಿಮ್ಮ ಸಂಪರ್ಕದಲ್ಲಿರುವ ಇತರರ ಖಾತೆಗಳನ್ನು ಹ್ಯಾಕರ್ ಗಳು ಗುರಿ ಮಾಡುತ್ತಾರೆ. ಅದೇ ಸರಳ ತಂತ್ರವನ್ನು ಬಳಸುತ್ತಾರೆ. ಹೀಗೆ ಒಬ್ಬರಾದ ನಂತರ ಮತ್ತೊಬ್ಬರನ್ನು ಸಾಲು ಸಾಲಾಗಿ ಹ್ಯಾಕಿಂಗ್ ಬಲೆಗೆ ಬೀಳಿಸುತ್ತಾರೆ.
• ಇಮೇಜ್ ಡೌನ್ಲೋಡ್ ವಂಚನೆ : ನಿಮಗೆ ಕುತೂಹಲ ಮೂಡಿಸುವ ಚಿತ್ರವೊಂದರ ವಾಟ್ಸಪ್ಪ್ ಮೆಸೇಜ್ ಬರುತ್ತದೆ, ನೀವೇನಾದರೂ ಅದನ್ನು ಕ್ಲಿಕ್ ಮಾಡಿದರೆ ಮುಗಿತು, ಸ್ಟೇಗೆನೊಗ್ರಫಿ ಮೂಲಕ ಆ ಇಮ್ಯಾಜಿನಲ್ಲಿ ಹುದುಗಿರುವ ಮಾಲ್ವೇರ್, ನಿಮ್ಮ ಸ್ಮಾರ್ಟ್ ಫೋನ್ ಅಥವಾ ಕಂಪ್ಯೂಟರ್ ಅನ್ನು ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಂಡು ಅದರಲ್ಲಿರುವ ಮಾಹಿತಿಯನ್ನು ಕದಿಯುತ್ತದೆ ಅಥವಾ OTP ಕದ್ದು ನಿಮ್ಮ ವಾಟ್ಸಪ್ಪ್ ಅಥವಾ ಇತರ ಸೋಶಿಯಲ್ ಮೀಡಿಯಾ ಅಕೌಂಟ್ ಗಳನ್ನು ಹ್ಯಾಕ್ ಮಾಡಲು ಸೈಬರ್ ಖದೀಮರಿಗೆ ಸಹಾಯ ಮಾಡುತ್ತದೆ.

ವಾಟ್ಸಪ್ ವಂಚನೆಗಳಿಂದ ನಿಮ್ಮನ್ನು ನೀವು ರಕ್ಷಿಸಿಕೊಳ್ಳಲು :-

• ಎಲ್ಲಾ ಡಿಜಿಟಲ್ ವಹಿವಾಟುಗಳಿಗೆ ಯಾವಾಗಲೂ ‘ತಾಳ್ಮೆ, ಶೂನ್ಯ ನಂಬಿಕೆ ಮತ್ತು ದೃಢೀಕರಣ’ ತತ್ವವನ್ನು ಅನುಸರಿಸಿ.
• ಅಪರಿಚಿತ ಸಂಖ್ಯೆಗಳಿಂದ ಬರುವ ಯಾವುದೇ ಸಂದೇಶಗಳಲ್ಲಿನ ಹೈಪರ್‌ಲಿಂಕ್‌ಗಳನ್ನು ಕ್ಲಿಕ್ ಮಾಡಬೇಡಿ ಮತ್ತು QR ಕೋಡ್ ಸ್ಕ್ಯಾನ್ ಮಾಡಬೇಡಿ.
• ಯಾವುದೇ ಸಾರ್ವಜನಿಕ ವೆಬ್‌ಸೈಟ್‌ಗಳು ಅಥವಾ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ನಿಮ್ಮ ಫೋನ್ ಸಂಖ್ಯೆ ಸೇರಿದಂತೆ ನಿಮ್ಮ ವೈಯಕ್ತಿಕ ಅಥವಾ ಆರ್ಥಿಕ ಸೂಕ್ಷ್ಮ ಮಾಹಿತಿಯನ್ನು ಎಂದಿಗೂ ಹಂಚಿಕೊಳ್ಳಬೇಡಿ.
• ನಿಮ್ಮ ಸಂದೇಶಕ್ಕೆ ಪ್ರತ್ಯುತ್ತರ ಅಥವಾ ಕಾಮೆಂಟ್‌ ಮೂಲಕ ನಿಮ್ಮನ್ನು ಸಂಪರ್ಕಿಸುವ ಮತ್ತು ಸಹಾಯವನ್ನು ನೀಡುವ ಯಾವುದೇ ವ್ಯಕ್ತಿಯ ಬಗ್ಗೆ ಜಾಗರೂಕರಾಗಿರಿ, ನೀವು ಅವರೊಂದಿಗೆ ಮಾತನಾಡುವ ಅಥವಾ ವಿವರಗಳನ್ನು ಹಂಚಿಕೊಳ್ಳುವ ಮೊದಲು ಅವರು ಅಸಲಿಯೇ ಎಂಬುದನ್ನು ಪರಿಶೀಲಿಸಿ ದೃಢೀಕರಿಸಿದ ನಂತರವೇ ಅವರೊಂದಿಗೆ ಮಾಹಿತಿ ಹಂಚಿಕ್ಕೊಳ್ಳಿ.
• ಅಪರಿಚಿತರಿಗೆ OTP ಗಳನ್ನು ನೀಡುವ ಮೊದಲು, ಆ OTP ಯಾವುದಕ್ಕಾಗಿ ಎಂಬುದನ್ನು ಓದಿ, ಖಚಿತಪಡಿಸಿ ನಂತರ ಹಂಚಿಕೊಳ್ಳಿ.
• ನಿಮ್ಮ ವಾಟ್ಸಾಪ್ ಅಕೌಂಟ್ ಗೆ ಕೂಡಲೇ ಟೂ ಫ್ಯಾಕ್ಟರ್ ಆಥೆಂಟಿಕೇಷನ್ ಅನ್ನು ಅಳವಡಿಸಿ.

ನೀವು ವಾಟ್ಸಪ್ ವಂಚನೆಗೆ ಬಲಿಯಾಗಿದ್ದರೆ :-

ತಕ್ಷಣವೇ 1930 ಸೈಬರ್ ಸಹಾಯವಾಣಿಗೆ ಕರೆ ಮಾಡಿ ಅಥವಾ cybercrime.gov.in ವೆಬ್ಸೈಟ್ ಅಥವಾ ಹತ್ತಿರದ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿ. ವಂಚನೆಯ ಬಗ್ಗೆ ಬ್ಯಾಂಕ್/ಬ್ರೋಕರಿಂಗ್ ವೆಬ್ಸೈಟ್ ನಲ್ಲಿ ವರದಿ ಮಾಡಿ, ದೂರು ಸಲ್ಲಿಸಿ ಮತ್ತು ವರ್ಗಾವಣೆಯಾದ ಮೊತ್ತದ ಮೇಲೆ ಡೆಬಿಟ್ ಫ್ರೀಜ್ ಮಾಡಿ. ನಿಮ್ಮ ಸಾಧನವು ಮಾಲ್ವೇರ್ ಸೋಂಕಿಗೆ ಒಳಗಾಗಿದೆ ಎಂದು ನೀವು ಭಾವಿಸಿದರೆ, ಅದನ್ನು ಬ್ಯಾಕಪ್ ತೆಗೆದುಕೊಂಡ ನಂತರ ಫಾರ್ಮ್ಯಾಟ್ ಮಾಡಿ ಅಥವಾ ಫ್ಯಾಕ್ಟರಿ ರಿಸೆಟ್ ಮಾಡಿ.

ಸಂತ್ರಸ್ತರಿಗೆ ಲಭ್ಯವಿರುವ ಕಾನೂನು ಪರಿಹಾರಗಳು :-

ನಿಮ್ಮ ಹತ್ತಿರದ ಸೈಬರ್ ಅಥವಾ ಸಾಮಾನ್ಯ ಅಡಿಯಲ್ಲಿ  ಪೊಲೀಸ್ ಠಾಣೆಯಲ್ಲಿ ನೀವು ಕ್ರಿಮಿನಲ್ ಪ್ರಕರಣವನ್ನು ಈ ಕೆಳಗಿನ ಕಾನೂನು ಸೆಕ್ಷನ್ ಅಥವಾ ನಿಮ್ಮ ಪ್ರಕರಣದ ಆಧಾರದ ಮೇಲೆ ಪೊಲೀಸರು ಸೂಚಿಸಿದ ಸೆಕ್ಷನ್ಗಳ ಅಡಿಯಲ್ಲಿ ದೂರು ದಾಖಲಿಸಬಹುದು:

• ಭಾರತೀಯ ನ್ಯಾಯ ಸಂಹಿತ (BNS) ಸೆಕ್ಷನ್ 303(ಕಳ್ಳತನ), 319 (ಸೋಗು ಹಾಕುವ ಮೂಲಕ ವಂಚನೆಗೆ ಶಿಕ್ಷೆ) 336ಮತ್ತು 318 (ವಂಚನೆ), ಸೆಕ್ಷನ್ 323(ಕಾನೂನುಬಾಹಿರವಾಗಿ ಡೇಟಾವನ್ನು ಹೊರತೆಗೆಯುವುದು), ಸೆಕ್ಷನ್ 329(ಕ್ರಿಮಿನಲ್ ಅತಿಕ್ರಮಣ), ಸೆಕ್ಷನ್ 338 (ಫೋರ್ಜರಿ), ಸೆಕ್ಷನ್ 337( ಫೋರ್ಜರಿ/ನಕಲಿಗಾಗಿ ಶಿಕ್ಷೆ), ಮತ್ತು ಸೆಕ್ಷನ್ 340 (ಫೋರ್ಜರಿ/ನಕಲಿ ದಾಖಲೆಯ ಬಳಕೆ).
• ಮಾಹಿತಿ ತಂತ್ರಜ್ಞಾನ ಕಾಯಿದೆ (IT) ಕಾಯಿದೆ 2000/08 ಸೆಕ್ಷನ್ 43 (ಕಂಪ್ಯೂಟರ್, ಕಂಪ್ಯೂಟಿಂಗ್ ಸಾಧನ ಇತ್ಯಾದಿಗಳಿಗೆ ಹಾನಿಗಾಗಿ ದಂಡ ಮತ್ತು ಪರಿಹಾರ), ಸೆಕ್ಷನ್ 65 (ಕಂಪ್ಯೂಟರ್ ಅನ್ನು ಹಾಳುಮಾಡುವುದು), ಸೆಕ್ಷನ್ 66 (ಕಂಪ್ಯೂಟರ್ ಸಂಬಂಧಿತ ಅಪರಾಧಗಳಿಗೆ ಶಿಕ್ಷೆ – ಡೇಟಾ ಕಳ್ಳತನ ಮಾಡುವ ವ್ಯಕ್ತಿ, ಸಿಸ್ಟಮ್ಗೆ ವೈರಸ್ ಹರಡುವುದು, ಡೇಟಾ ನಾಶಪಡಿಸುವುದು, ಹ್ಯಾಕಿಂಗ್ , ಅಥವಾ ಅಧಿಕೃತ ವ್ಯಕ್ತಿಗೆ ಕಂಪ್ಯೂಟರ್ ಅಥವಾ ನೆಟ್ವರ್ಕ್ಗೆ ಪ್ರವೇಶವನ್ನು ನಿರಾಕರಿಸುವುದು), ಸೆಕ್ಷನ್ 66C (ಇದು ಗುರುತಿನ ಕಳ್ಳತನಕ್ಕೆ ದಂಡವನ್ನು ಸೂಚಿಸುತ್ತದೆ ಮತ್ತು ವ್ಯಕ್ತಿಯ ಗುರುತಿನ ಮಾಹಿತಿಯನ್ನು ಮೋಸದಿಂದ ಅಥವಾ ಅಪ್ರಾಮಾಣಿಕವಾಗಿ ಬಳಸುವುದು) ಮತ್ತು ಸೆಕ್ಷನ್ 66D (ಕಂಪ್ಯೂಟರ್ ಸಂಪನ್ಮೂಲಗಳನ್ನು ಬಳಸಿಕೊಂಡು ಸೋಗು ಹಾಕುವ ಮೂಲಕ ಮಾಡಿದ ವಂಚನೆಗೆ ಶಿಕ್ಷೆ).