ಮಹಾಭಾರತದ ಕುರುಕ್ಷೇತ್ರ ಯುದ್ಧದಲ್ಲಿ ಅರ್ಜುನನ ಕೈಲಿದ್ದ ‘ಗಾಂಡೀವ’ ಧನುಸ್ಸು ಅಜೇಯವಾದುದು. ಇಂದು 21ನೇ ಶತಮಾನದ ಡಿಜಿಟಲ್ ಯುಗದಲ್ಲಿ, ಭಾರತ ಸರ್ಕಾರವು ಅದೇ ಹೆಸರಿನಲ್ಲಿ ಒಂದು ಅದ್ಭುತ ಕೃತಕ ಬುದ್ಧಿಮತ್ತೆ (AI – Artificial Intelligence) ತಂತ್ರಜ್ಞಾನವನ್ನು ರಾಷ್ಟ್ರೀಯ ಭದ್ರತಾ ವ್ಯವಸ್ಥೆಯಲ್ಲಿ ಅಳವಡಿಸಿದೆ. ಇದು ಕೇವಲ ಒಂದು ಸಾಫ್ಟ್ವೇರ್ ಅಲ್ಲ, ಬದಲಿಗೆ ಭಾರತದ ರಾಷ್ಟ್ರೀಯ ಗುಪ್ತಚರ ಜಾಲದ (NATGRID – National Intelligence Grid ) ಮೇಲೆ ಕಾರ್ಯನಿರ್ವಹಿಸುವ ಒಂದು ಅತ್ಯಾಧುನಿಕ ‘ಡಿಜಿಟಲ್ ಮೆದುಳು’. ಅಪರಾಧ ಮುಕ್ತ ಮತ್ತು ಭಯೋತ್ಪಾದನಾ ಮುಕ್ತ ಭಾರತವನ್ನು ನಿರ್ಮಿಸುವ ನಿಟ್ಟಿನಲ್ಲಿ ಇದು ಒಂದು ಮೈಲಿಗಲ್ಲು. ಸರಳವಾಗಿ ಹೇಳುವುದಾದರೆ ಕೇಂದ್ರ ಸರ್ಕಾರವು NATGRID ಎಂಬ ದತ್ತಾಂಶ ಜಾಲದ ಮೇಲೆ “ಗಾಂಡೀವ” ಹೆಸರಿನ AI ತಂತ್ರಜ್ಞಾನವನ್ನು ಅಳವಡಿಸಿದೆ. ಈ ಸಾಫ್ಟ್ವೇರ್ ಕೋಟ್ಯಂತರ ಮಾಹಿತಿಗಳ ನಡುವೆ ಅಡಗಿರುವ ಕ್ರಿಮಿನಲ್ಗಳ ವಿವರಗಳನ್ನು ನಿಖರವಾಗಿ ಪತ್ತೆಹಚ್ಚಲು ಸಹಾಯ ಮಾಡುತ್ತದೆ. ಭಾರತ ನಿಧಾನವಾಗಿ ವಿಶ್ವದ ದೊಡ್ಡ ಡೇಟಾ ಮತ್ತು ಗುಪ್ತಚರ ವ್ಯವಸ್ಥೆಗಳಲ್ಲಿ ಒಂದನ್ನು ನಿರ್ಮಿಸುತ್ತಿದೆ. ಈ ಲೇಖನದಲ್ಲಿ ಗಾಂಡೀವ ಎಂದರೇನು, ಅದು ಹೇಗೆ ಕೆಲಸ ಮಾಡುತ್ತದೆ, ಈಗ ಯಾವ ಹಂತದಲ್ಲಿದೆ, ಸರ್ಕಾರ ಮತ್ತು ಸಾಮಾನ್ಯ ಜನರಿಗೆ ಅದರ ಲಾಭಗಳು ಏನು, ಮತ್ತು ಖಾಸಗಿತನದ ಆತಂಕಗಳು ಏನು ಎಂಬುದನ್ನು ಸರಳವಾಗಿ ತಿಳಿದುಕೊಳ್ಳೋಣ. ಭಾರತ ಸರ್ಕಾರ ಡಿಜಿಟಲ್ ಭದ್ರತೆ ಮತ್ತು ಸೈಬರ್ ಅಪರಾಧ ತಡೆಗಟ್ಟುವಿಕೆಗಾಗಿ AI ಅನ್ನು ವ್ಯಾಪಕವಾಗಿ ಬಳಸುತ್ತಿದೆ, ಭಾರತ ಸರ್ಕಾರ ಅಭಿವೃದ್ಧಿಪಡಿಸಿದ ಇತರ ಅಂತಹ ಸಾಧನಗಳ ಬಗ್ಗೆ ತಿಳಿದುಕೊಳ್ಳಲು ನನ್ನ ದ್ವಿಭಾಷಾ ಬ್ಲಾಗ್ www.cybermithra.in ಗೆ ಭೇಟಿ ನೀಡಿ.
ಏನಿದು ಗಾಂಡೀವ?
2008ರ ಮುಂಬೈ ಉಗ್ರ ದಾಳಿಯ ನಂತರ ದೊಡ್ಡ ಸಮಸ್ಯೆ ಒಂದನ್ನು ಸರ್ಕಾರ ಗಮನಿಸಿತು. ಹಲವು ಇಲಾಖೆಗಳ ಬಳಿ ಮಾಹಿತಿ ಇದ್ದರೂ, ಅವುಗಳನ್ನು ಒಟ್ಟುಗೂಡಿಸಿ ಬಳಸುವ ವ್ಯವಸ್ಥೆ ಇರಲಿಲ್ಲ. ತನಿಖಾ ಸಂಸ್ಥೆಗಳಾದ NIA, RAW ಅಥವಾ IB ನಡುವೆ ಮಾಹಿತಿ ವಿನಿಮಯವು ಹಳೆಯ ಪದ್ಧತಿಯಲ್ಲಿ ನಡೆಯುತ್ತಿತ್ತು. ಈ ಕೊರತೆಯನ್ನು ತುಂಬಲು NATGRID ಅನ್ನು ನಿರ್ಮಿಸಲಾಯಿತು. ನಮ್ಮ ದೇಶದಲ್ಲಿ ಬ್ಯಾಂಕ್ ಖಾತೆಗಳು, ಪಾಸ್ಪೋರ್ಟ್, ಫೋನ್ ಕರೆಗಳು ಮತ್ತು ವಾಹನ ನೋಂದಣಿಯಂತಹ ಸುಮಾರು 21 ವಿವಿಧ ಮೂಲಗಳಿಂದ ಮಾಹಿತಿಗಳನ್ನು NATGRID ಸಂಗ್ರಹಿಸುತ್ತದೆ. NATGRID ಮೊದಲಿನಿಂದಲೇ ಕೇವಲ ಡೇಟಾ ಸಂಪರ್ಕ ವ್ಯವಸ್ಥೆಯಾಗಿತ್ತು, ಇದನ್ನು ಬುದ್ಧಿವಂತ ವ್ಯವಸ್ಥೆಯಾಗಿ ಮಾಡುವುದೇ ಗಾಂಡೀವ. ಗಾಂಡೀವ ಒಂದು “ಡಿಜಿಟಲ್ ಮೆದುಳು”, ಇದೊಂದು NATGRID ದತ್ತಾಂಶದ ಮೇಲೆ ನಿರ್ಮಿಸಲಾದ ಕೃತಕ ಬುದ್ಧಿಮತ್ತೆ (AI) ಆಧಾರಿತ ವಿಶ್ಲೇಷಣಾ ವ್ಯವಸ್ಥೆ. “ಗಾಂಡೀವ” ಎಂಬ ಹೆಸರು ಮಹಾಭಾರತದ ಅರ್ಜುನನ ಬಿಲ್ಲಿನಿಂದ ಬಂದಿದ್ದು, ನಿಖರತೆ ಮತ್ತು ಶಕ್ತಿಯ ಸಂಕೇತವಾಗಿದೆ. ಇದು ಕೋಟ್ಯಂತರ ಮಾಹಿತಿಯ ರಾಶಿಯನ್ನು ವಿಶ್ಲೇಷಿಸಿ, ಸಂಬಂಧವಿರುವ ದತ್ತಾಂಶಗಳ ನಡುವೆ ಕೊಂಡಿಯನ್ನು ಪತ್ತೆ ಮಾಡುತ್ತದೆ ಮತ್ತು ತನಿಖಾ ಸಂಸ್ಥೆಗಳಿಗೆ ಅಪರಾಧಗಳನ್ನು ಮತ್ತು ಅಪರಾಧಿಗಳನ್ನು ಪತ್ತೆಹಚ್ಚಲು ನೆರವು ಮಾಡತ್ತದೆ.
ಗಾಂಡೀವ ಹೇಗೆ ಕೆಲಸ ಮಾಡುತ್ತದೆ?
ಗಾಂಡೀವ NATGRID ದತ್ತಾಂಶ ಜಾಲವನ್ನು ಬಳಸಿ :
- ವ್ಯಕ್ತಿಗಳ ಗುರುತು ಪತ್ತೆ: ಒಬ್ಬ ಅಪರಾಧಿ ಬೇರೆ ಬೇರೆ ಹೆಸರಿನಲ್ಲಿ ಬ್ಯಾಂಕ್ ಖಾತೆ ಅಥವಾ ಸಿಮ್ ಕಾರ್ಡ್ ಹೊಂದಿದ್ದರೆ, ಈ ತಂತ್ರಜ್ಞಾನವು ಅವರ ವಿಳಾಸ ಅಥವಾ ಫೋಟೋಗಳನ್ನು ಹೋಲಿಸಿ ನೋಡಿ ಇವರೆಲ್ಲರೂ ಒಬ್ಬರೇ ಎಂದು ಪತ್ತೆ ಹಚ್ಚುತ್ತದೆ.
- ಶಂಕಾಸ್ಪದ ನಡವಳಿಕೆ : ಉದಾಹರಣೆಗೆ, ಒಬ್ಬ ವ್ಯಕ್ತಿ ಅನಿರೀಕ್ಷಿತವಾಗಿ ವಿದೇಶದಿಂದ ಹಣ ಪಡೆದು, ಕೂಡಲೇ ಸ್ಫೋಟಕಕ್ಕೆ ಬಳಸುವ ರಾಸಾಯನಿಕಗಳನ್ನು ಖರೀದಿಸಿದರೆ, ಗಾಂಡೀವ ತಕ್ಷಣವೇ ತನಿಖಾ ಸಂಸ್ಥೆಗಳಿಗೆ ಎಚ್ಚರಿಕೆ ರವಾನಿಸುತ್ತದೆ.
- ನೈಜ ಸಮಯದ ನಿಗಾ : ಒಬ್ಬ ಸಂಶಯಾಸ್ಪದ ವ್ಯಕ್ತಿ ವಿಮಾನ ನಿಲ್ದಾಣಕ್ಕೆ ಬಂದಾಗ ಅಥವಾ ಹೋಟೆಲ್ನಲ್ಲಿ ವಾಸ್ತವ್ಯ ಹೂಡಿದಾಗ, ಆ ಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡುವ ಸಾಮರ್ಥ್ಯ ಇದಕ್ಕೆ ಇದೆ.
- ಎಂಟಿಟಿ ರೆಸಲ್ಯೂಶನ್ : ಒಬ್ಬ ವ್ಯಕ್ತಿಯು ಹತ್ತು ಬೇರೆ ಬೇರೆ ಹೆಸರಿನಲ್ಲಿ ಅಥವಾ ಸಣ್ಣ ಪುಟ್ಟ ಬದಲಾವಣೆಗಳೊಂದಿಗೆ ವಿಳಾಸ ನೀಡಿದ್ದರೆ, ಈ ತಂತ್ರಜ್ಞಾನವು ಆತನ ಫೋಟೋ, ಜನ್ಮ ದಿನಾಂಕ ಅಥವಾ ಬಯೋಮೆಟ್ರಿಕ್ ಮೂಲಕ ಅವರೆಲ್ಲರೂ ಒಬ್ಬರೇ ಎಂದು ಖಚಿತಪಡಿಸುತ್ತದೆ.
- ಪ್ಯಾಟರ್ನ್ ಗುರುತಿಸುವಿಕೆ : ಅಪರಾಧಿಗಳು ಸಾಮಾನ್ಯವಾಗಿ ಕೆಲವು ನಿರ್ದಿಷ್ಟ ಪ್ಯಾಟರ್ನ್ಗಳನ್ನು ಅನುಸರಿಸುತ್ತಾರೆ. ಉದಾಹರಣೆಗೆ, ಒಂದು ನಿರ್ದಿಷ್ಟ ಪ್ರದೇಶದಲ್ಲಿ ಹಣದ ವರ್ಗಾವಣೆ ಹೆಚ್ಚಾದಾಗ ಅಥವಾ ಅಸಹಜವಾದ ಇಂಟರ್ನೆಟ್ ಚಟುವಟಿಕೆ ಕಂಡುಬಂದಾಗ, ಗಾಂಡೀವ ಇದನ್ನು ತಕ್ಷಣವೇ ಗುರುತಿಸುತ್ತದೆ.
- 360-ಡಿಗ್ರಿ ಪ್ರೊಫೈಲಿಂಗ್ : ಈ ವ್ಯವಸ್ಥೆಯು ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (NPR) ಮತ್ತು ಆಧಾರ್ನಂತಹ ದತ್ತಾಂಶಗಳನ್ನು ಬಳಸಿಕೊಂಡು ಒಬ್ಬ ವ್ಯಕ್ತಿಯ ಸಂಪೂರ್ಣ ಸಾಮಾಜಿಕ ಮತ್ತು ಆರ್ಥಿಕ ಚಿತ್ರಣವನ್ನು ತನಿಖಾಧಿಕಾರಿಗಳ ಮುಂದೆ ಇಡುತ್ತದೆ.
ಸೈಬರ್ ಕ್ರೈಂ ತಡೆಗಟ್ಟಲು ಗಾಂಡೀವ ಹೇಗೆ ಸಹಕಾರಿ?
ಇತ್ತೀಚಿನ ದಿನಗಳಲ್ಲಿ ಡಿಜಿಟಲ್ ಅರೆಸ್ಟ್ ಮತ್ತು ಬ್ಯಾಂಕ್ ವಂಚನೆಗಳು ಹೆಚ್ಚುತ್ತಿವೆ. ಗಾಂಡೀವ ಇವುಗಳನ್ನು ತಡೆಯಲು :
- ಹಣದ ಜಾಡು : ಸೈಬರ್ ವಂಚಕರು ಜನರಿಂದ ಲೂಟಿ ಮಾಡಿದ ಹಣ ಯಾವ ಯಾವ ಬ್ಯಾಂಕ್ ಖಾತೆಗಳಿಗೆ ವರ್ಗಾವಣೆಯಾಗಿದೆ ಎಂಬುದನ್ನು ತಕ್ಷಣವೇ ಪತ್ತೆಹಚ್ಚಿ ಆ ಖಾತೆಗಳನ್ನು ಫ್ರೀಜ್ ಮಾಡಲು ಸಹಾಯಮಾಡುತ್ತದೆ.
- ನಕಲಿ ದಾಖಲೆಗಳ ಪತ್ತೆ: ನಕಲಿ ದಾಖಲೆ ನೀಡಿ ಪಡೆದ ಲಕ್ಷಾಂತರ ಸಿಮ್ ಕಾರ್ಡ್ಗಳನ್ನು ಇದು ಪತ್ತೆ ಹಚ್ಚಿ ರದ್ದುಗೊಳಿಸಲು ಸಹಾಯ ಮಾಡುತ್ತದೆ.
- ಸೈಬರ್ ಅಪರಾಧಿಗಳ ಪತ್ತೆ : ಇದು IP ವಿಳಾಸ, ಫೋನಿನ SIM ಡೇಟಾ, ಬ್ಯಾಂಕ್ ವ್ಯವಹಾರ ಎಲ್ಲವನ್ನೂ ಜೋಡಿಸುತ್ತದೆ ಮತ್ತು ಅದನ್ನು ಸಂಸ್ಕರಿಸಿ ಪೊಲೀಸರಿಗೆ ಸೈಬರ್ ಅಪರಾಧಿಗಳ ಪತ್ತೆಗೆ ಸಹಾಯ ಮಾಡುತ್ತದೆ.
ಸರ್ಕಾರ ಮತ್ತು ಜನಸಾಮಾನ್ಯರಿಗೆ ಗಾಂಡೀವ ತಂತ್ರಜ್ಞಾನದಿಂದ ಆಗುವ ಲಾಭಗಳು :-
- ಭಯೋತ್ಪಾದನೆ ತಡೆ ಮತ್ತು ನಿಗ್ರಹ : ಮುಂಬೈ ದಾಳಿಯಂತಹ ಘಟನೆಗಳು ಮರುಕಳಿಸದಂತೆ ತಡೆಯಲು ಇದು ಸಹಕಾರಿ. ಸಂಶಯಾಸ್ಪದ ವ್ಯಕ್ತಿಗಳ ಚಟುವಟಿಕೆಯನ್ನು ಮೊದಲೇ ಪತ್ತೆ ಮಾಡಬಹುದು. ಭಯೋತ್ಪಾದಕ ಜಾಲಗಳ ಹಣಕಾಸು, ಸಂವಹನ ಮತ್ತು ಚಲನವಲನ ಮಾದರಿಗಳನ್ನು ಮೊದಲೇ ಗುರುತಿಸಿ ದಾಳಿ ತಡೆಯಬಹುದು.
- ತ್ವರಿತ ತನಿಖೆ : ಈ ಹಿಂದೆ ತಿಂಗಳುಗಟ್ಟಲೆ ಸಮಯ ತೆಗೆದುಕೊಳ್ಳುತ್ತಿದ್ದ ದತ್ತಾಂಶ ವಿಶ್ಲೇಷಣೆಯನ್ನು ಇದು ಕೆಲವೇ ಸೆಕೆಂಡುಗಳಲ್ಲಿ ಪೂರ್ಣಗೊಳಿಸುತ್ತದೆ. ಉದಾಹರಣೆಗೆ ಹಿಂದೆ ಒಬ್ಬ ಅನುಮಾನಿತನ ಬ್ಯಾಂಕ್ ವಿವರ ಮತ್ತು ವಿಮಾನ ಪ್ರಯಾಣ ದಾಖಲೆ ಸಂಗ್ರಹಿಸಿ ವಿಶ್ಲೇಷಿಸಲು ವಾರಗಳು ತಗಲುತ್ತಿದ್ದವು, ಗಾಂಡೀವ ಇದನ್ನು ಕ್ಷಣಗಳಲ್ಲಿ ಮಾಡುತ್ತದೆ. ಇದು ತನಿಖಾಧಿಕಾರಿಗಳ ಸಮಯ, ಶ್ರಮ ಮತ್ತು ಸಂಪನ್ಮೂಲ ಉಳಿಸುತ್ತದೆ.
- ಆರ್ಥಿಕ ಭದ್ರತೆ : ತೆರಿಗೆಗಳ್ಳತನ ಮತ್ತು ಹಣ ಅಕ್ರಮ ವರ್ಗಾವಣೆ(Money Laundering) ತಡೆಯುವ ಮೂಲಕ ದೇಶದ ಆರ್ಥಿಕತೆಯನ್ನು ಬಲಪಡಿಸುತ್ತದೆ.
- ರಾಷ್ಟ್ರೀಯ ಭದ್ರತೆ : ದೇಶದ ಗಡಿ ಮತ್ತು ಆಂತರಿಕ ಸುರಕ್ಷತೆಯನ್ನು ಕಾಪಾಡುವಲ್ಲಿ ಇದು ಭದ್ರತಾ ಪಡೆಗಳಿಗೆ ‘ಬಲವರ್ಧಕ’ವಾಗಿ ಕೆಲಸ ಮಾಡುತ್ತದೆ.
- ಸಂಘಟಿತ ಅಪರಾಧ ವಿರುದ್ಧ ಹೋರಾಟ : ಮಾದಕ ದ್ರವ್ಯ ಕಳ್ಳಸಾಗಣೆ, ಹವಾಲಾ ಜಾಲ, ಅಕ್ರಮ ಹಣ ವರ್ಗಾವಣೆ — ಇಂತಹ ಸಂಕೀರ್ಣ ಅಪರಾಧ ಜಾಲಗಳ ಸದಸ್ಯರ ನಡುವಿನ ಸಂಪರ್ಕ ಕಂಡುಹಿಡಿಯಲು ಗಾಂಡೀವ ಸಹಕಾರಿ.
- ಕೇಂದ್ರ-ರಾಜ್ಯ ಸಮನ್ವಯ : ಬೇರೆ ಬೇರೆ ರಾಜ್ಯಗಳ ಪೊಲೀಸ್ ಸಂಸ್ಥೆಗಳ ನಡುವೆ ತ್ವರಿತ ಮಾಹಿತಿ ವಿನಿಮಯ ಸಾಧ್ಯವಾಗಿ, ರಾಜ್ಯ ಗಡಿ ದಾಟಿ ನಡೆಯುವ ಅಪರಾಧಗಳ ತನಿಖೆ ಸುಲಭವಾಗುತ್ತದೆ.
- ಕಾಣೆಯಾದವರ ಪತ್ತೆ : ಗಾಂಡೀವದ ಮುಖ ಗುರುತಿಸುವ ತಂತ್ರಜ್ಞಾನ ಮತ್ತು natgrid ಮಾಹಿತಿ ವ್ಯವಸ್ಥೆ ಕಾಣೆಯಾದವರ ಪತ್ತೆಗೆ ಸಹಾಯ ಮಾಡಬಹುದು.
- ಸೈಬರ್ ವಂಚನೆಗಳಿಂದ ರಕ್ಷಣೆ : ಸೈಬರ್ ವಂಚನೆ ನಡೆದಾಗ ಹಣವು ಯಾವ ಖಾತೆಗಳಿಗೆ ವರ್ಗಾವಣೆಯಾಗಿದೆ ಎಂಬುದನ್ನು ಗಾಂಡೀವ ನೈಜ ಸಮಯದಲ್ಲಿ ಪತ್ತೆಹಚ್ಚಲು ಸಹಾಯ ಮಾಡುತ್ತದೆ. ಭದ್ರತಾ ಸಂಸ್ಥೆಗಳು ಆ ಖಾತೆಗಳಲ್ಲಿ ಹಣವನ್ನು ತಡೆಹಿಡಿದು ಸಂತ್ರಸ್ತರಿಗೆ ಮರಳಿಸಬಹುದು.
ಗಾಂಡೀವದಿಂದ ಗೌಪ್ಯತೆ ಮತ್ತು ನಾಗರಿಕ ಹಕ್ಕುಗಳ ಆತಂಕಗಳು :-
ಗಾಂಡೀವ ಮತ್ತು NATGRID ವ್ಯವಸ್ಥೆ ವಿರುದ್ಧ ನ್ಯಾಯವಾದ ಮತ್ತು ಗಂಭೀರ ಆತಂಕಗಳು ವ್ಯಕ್ತವಾಗುತ್ತಿವೆ:
- ಕಾನೂನಿನ ಚೌಕಟ್ಟಿನ ಕೊರತೆ : NATGRID ಸಂಸದೀಯ ಕಾಯ್ದೆಯಿಲ್ಲದೆ ಕಾರ್ಯಾರಂಭ ಮಾಡಿದೆ. ಇದರ ಅಧಿಕಾರ, ಮಿತಿ ಮತ್ತು ಹೊಣೆಗಾರಿಕೆ ನಿರ್ಧರಿಸಲು ನಿರ್ದಿಷ್ಟ ಕಾನೂನು ಇಲ್ಲ. RTI ಕಾಯ್ದೆಯಿಂದ ಇದನ್ನು ವಿನಾಯಿತಿ ನೀಡಲಾಗಿದ್ದು, ಸಾರ್ವಜನಿಕ ಪರಿಶೀಲನೆ ಅಸಾಧ್ಯ.
- FIR ಇಲ್ಲದೆ ಡೇಟಾ ಪ್ರವೇಶ : ಹಾಲಿ ವ್ಯವಸ್ಥೆಯಲ್ಲಿ ತನಿಖಾ ಏಜೆನ್ಸಿಗಳು FIR ದಾಖಲಿಸುವ ಮೊದಲೇ ಖಾಸಗಿ ಡೇಟಾ ಪ್ರವೇಶಿಸಬಹುದು. 2017ರಲ್ಲಿ ಸರ್ವೋಚ್ಚ ನ್ಯಾಯಾಲಯ ನೀಡಿದ ಪ್ರಮುಖ ತೀರ್ಪು — “ಖಾಸಗಿತನ ಮೂಲಭೂತ ಹಕ್ಕು” (ಜಸ್ಟಿಸ್ ಕೆ.ಎಸ್. ಪುಟ್ಟಸ್ವಾಮಿ VS ಭಾರತ ಒಕ್ಕೂಟ) — ಅನ್ನು ಇದು ಉಲ್ಲಂಘಿಸಬಹುದು ಎಂಬ ಆತಂಕ ಇದೆ.
- ಸಾಮೂಹಿಕ ಕಣ್ಗಾವಲಿನ ಅಪಾಯ : 119 ಕೋಟಿ ಜನರ NPR ಡೇಟಾ ಜೋಡಣೆಯಿಂದ, ಈ ವ್ಯವಸ್ಥೆ ಕೇವಲ ಅಪರಾಧಿಗಳ ಮೇಲೆ ಗಮನ ಕೇಂದ್ರೀಕರಿಸದೆ ಇಡೀ ಜನಸಂಖ್ಯೆಯ ಡಿಜಿಟಲ್ ನಕ್ಷೆ ರಚಿಸುತ್ತದೆ. ಇದು ಸಾಮೂಹಿಕ ಕಣ್ಗಾವಲಿನ (Mass Surveillance) ಸಂಭಾವ್ಯ ಮಾರ್ಗವಾಗಬಹುದು.
- ದತ್ತಾಂಶ ದುರ್ಬಳಕೆ : ರಾಜಕೀಯ ವಿರೋಧಿಗಳು, ಪತ್ರಕರ್ತರು, ಮಾನವ ಹಕ್ಕು ಕಾರ್ಯಕರ್ತರ ವಿರುದ್ಧ ಈ ಅಧಿಕಾರ ದುರ್ಬಳಕೆ ಆಗಬಹುದೆಂಬ ಆತಂಕ ಸ್ವಾಭಾವಿಕ. AI ತಪ್ಪು ಮಾಡಿದರೆ ನಿರ್ದೋಷ ವ್ಯಕ್ತಿ ಶಿಕ್ಷೆ ಅನುಭವಿಸಬಹುದು.
- ಸ್ವತಂತ್ರ ಮೇಲ್ವಿಚಾರಣೆ ಇಲ್ಲ: ಪ್ರತಿ ಮಾಹಿತಿ ಮನವಿ ಲಾಗ್ ಆಗುತ್ತದೆ ಎಂದು ಸರ್ಕಾರ ಹೇಳುತ್ತದೆ. ಆದರೆ ಸಂಸದೀಯ ಅಥವಾ ನ್ಯಾಯಾಂಗ ಮೇಲ್ವಿಚಾರಣೆ ಇಲ್ಲದಿದ್ದರೆ, ಈ ಲಾಗ್ ಕೇವಲ ಕಾಗದದ ಔಪಚಾರಿಕತೆಯಾಗುತ್ತದೆ.
ಮುಂದಿನ ದಾರಿ – ಭದ್ರತೆ ಮತ್ತು ಸ್ವಾತಂತ್ರ್ಯ ನಡುವಿನ ಸೇತುವೆ :-
ಗಾಂಡೀವ ಸಾಧನ ಕೆಟ್ಟದ್ದಲ್ಲ, ಆದರೆ ಕಾವಲಿಲ್ಲದ ಶಕ್ತಿ ಅಪಾಯಕಾರಿ. ಈ ವ್ಯವಸ್ಥೆ ನಿಜಕ್ಕೂ ಜನರ ಒಳಿತಿಗೆ ಆಗಬೇಕಾದರೆ :
- NATGRID ಮತ್ತು ಗಾಂಡೀವ ಕಾರ್ಯಾಚರಣೆಗೆ ಸ್ಪಷ್ಟ ಸಂಸದೀಯ ಕಾನೂನು ರೂಪಿಸಬೇಕು.
- ಸ್ವತಂತ್ರ ನ್ಯಾಯಾಂಗ ಮೇಲ್ವಿಚಾರಣಾ ಸಮಿತಿ ರಚಿಸಿ ಪ್ರತಿ ಮಾಹಿತಿ ಮನವಿ ಔಚಿತ್ಯ ಪರಿಶೀಲಿಸಬೇಕು.
- 2023ರ ಡಿಜಿಟಲ್ ವ್ಯಕ್ತಿಗತ ಡೇಟಾ ಸಂರಕ್ಷಣಾ ಕಾಯ್ದೆ (DPDP Act) ತ್ವರಿತವಾಗಿ ಜಾರಿಗೆ ತರಬೇಕು.
- AI ಅಲ್ಗಾರಿದಮ್ನ ತಾರತಮ್ಯ ಮತ್ತು ತಪ್ಪು ನಿರ್ಣಯಗಳ ಬಗ್ಗೆ ಮೇಲ್ಮನವಿ ವ್ಯವಸ್ಥೆ ಬೇಕು.
- ಸಂಸದೀಯ ಸ್ಥಾಯಿ ಸಮಿತಿ ಪ್ರತಿ ವರ್ಷ ಈ ವ್ಯವಸ್ಥೆಯ ಬಳಕೆ ಪರಿಶೀಲಿಸಬೇಕು.
ಕಡೆಯದಾಗಿ, ಗಾಂಡೀವ ಕೇವಲ ತಂತ್ರಜ್ಞಾನ ಪ್ರಶ್ನೆಯಲ್ಲ — ಇದು ಪ್ರಜಾಪ್ರಭುತ್ವದ ಮೂಲ ಮೌಲ್ಯಗಳ ಪ್ರಶ್ನೆ. ಭಾರತ 26/11ರ ದುರಂತದಿಂದ ಪಾಠ ಕಲಿತು ಬುದ್ಧಿಮತ್ತೆ ಜಾಲ ನಿರ್ಮಿಸಿದ್ದು ಸ್ವಾಗತಾರ್ಹ. ಆದರೆ ರಾಷ್ಟ್ರೀಯ ಭದ್ರತೆ ಮತ್ತು ನಾಗರಿಕ ಸ್ವಾತಂತ್ರ್ಯ — ಇವೆರಡೂ ಪರಸ್ಪರ ವಿರೋಧಿಯಲ್ಲ, ಬದಲಿಗೆ ಒಂದೇ ನಾಣ್ಯದ ಎರಡು ಮುಖಗಳು. ಅರ್ಜುನನ ಗಾಂಡೀವ ಧರ್ಮರಕ್ಷಣೆಗಾಗಿ ಬಳಕೆಯಾಗಿತ್ತು; ಇಂದಿನ ಡಿಜಿಟಲ್ ಗಾಂಡೀವವೂ ಅದೇ ಧರ್ಮದ ಮಾರ್ಗದಲ್ಲಿ ಸಾಗಬೇಕೆಂದು ನಾಗರಿಕ ಸಮಾಜ ಆಶಿಸುತ್ತಿದೆ.
