ಕೆಲವೇ ತಿಂಗಳುಗಳ ಹಿಂದೆ ನಡೆದ ಒಂದು ಘಟನೆಯನ್ನು ನೆನಪಿಸಿಕೊಳ್ಳಿ. ಖ್ಯಾತ ನಟಿ ರಶ್ಮಿಕಾ ಮಂದಣ್ಣ ಅವರ ಮುಖವನ್ನು ಬಳಸಿಕೊಂಡು, ಬೇರೊಬ್ಬ ಮಹಿಳೆಯ ಅಶ್ಲೀಲ ವಿಡಿಯೋಗೆ ಜೋಡಿಸಿ ‘ಡೀಪ್‌ಫೇಕ್’ ವಿಡಿಯೋವನ್ನು ಅಂತರ್ಜಾಲದಲ್ಲಿ ಹರಿಬಿಡಲಾಯಿತು. ಅದು ಎಷ್ಟರಮಟ್ಟಿಗೆ ಅಸಲಿಯಾಗಿತ್ತೆಂದರೆ, ಸ್ವತಃ ನಟ ಅಮಿತಾಭ್ ಬಚ್ಚನ್ ಅವರೇ ಬೆಚ್ಚಿಬಿದ್ದು “ಇದರ ವಿರುದ್ಧ ಕಾನೂನು ಕ್ರಮ ಜರುಗಿಸಲೇ ಬೇಕು” ಎಂದು ಕೂಗೆಬ್ಬಿಸಬೇಕಾಯಿತು. ಇದು ಕೇವಲ ಒಬ್ಬ ಸೆಲೆಬ್ರಿಟಿಯ ಕಥೆಯಲ್ಲ. ಇಂದು, ನಿಮ್ಮ ಮಗಳ, ತಂಗಿಯ, ಪತ್ನಿಯ ಅಥವಾ ನಿಮ್ಮದೇ ಒಂದು ಸಾಮಾನ್ಯ ಫೋಟೋವನ್ನು ತೆಗೆದುಕೊಂಡು, ಕೆಲವೇ ನಿಮಿಷಗಳಲ್ಲಿ ಅದನ್ನು ನಗ್ನಗೊಳಿಸುವ ಅಥವಾ ಅಶ್ಲೀಲ ವಿಡಿಯೋಗೆ ಅಂಟಿಸುವ ತಂತ್ರಜ್ಞಾನವು ದುಷ್ಟರ ಕೈಗೆ ಸಿಕ್ಕಿದೆ. ಇದನ್ನು ನಾವು ಕೇವಲ ‘ಫೇಕ್ ವಿಡಿಯೋ’ ಎಂದು ಕರೆಯಲು ಸಾಧ್ಯವಿಲ್ಲ. ಇದು ‘ಡಿಜಿಟಲ್ ಅತ್ಯಾಚಾರ’. ಒಬ್ಬ ವ್ಯಕ್ತಿಯ, ಅದರಲ್ಲೂ ಮಹಿಳೆಯ ಘನತೆ, ಗೌರವ ಮತ್ತು ಆತ್ಮವಿಶ್ವಾಸವನ್ನು ಸಾರ್ವಜನಿಕವಾಗಿ ಹರಾಜು ಹಾಕುವ ಘೋರ ಅಪರಾಧ.
ಇನ್ನೊಂದು ಬಗೆಯ ಪಿಡುಗು ಇದೆ. ಅದಕ್ಕೆ ‘ರಿವೆಂಜ್ ಪಾರ್ನ್‘ ಎನ್ನುತ್ತಾರೆ. ಪ್ರೀತಿಸಿದವನೇ ಮೋಸ ಹೋದಾಗ, ಅಥವಾ ವಿಚ್ಛೇದನ ಪಡೆದ ಪತಿಯೇ, ಅವರೊಂದಿಗೆ ಹಿಂದೆ ಹಂಚಿಕೊಂಡಿದ್ದ ಖಾಸಗಿ ಚಿತ್ರಗಳನ್ನು ಅಥವಾ ವಿಡಿಯೋಗಳನ್ನು ಅಂತರ್ಜಾಲಕ್ಕೆ ಹಾಕಿ ಸೇಡು ತೀರಿಸಿಕೊಳ್ಳುವ ಹೇಯ ಕೃತ್ಯ. ಚಂಡೀಗಢ ವಿಶ್ವವಿದ್ಯಾಲಯದ ಹಾಸ್ಟೆಲ್‌ನಲ್ಲಿ ನಡೆದ ಘಟನೆಯನ್ನು ಮರೆಯಲು ಸಾಧ್ಯವೇ?
ಈ ‘ಡಿಜಿಟಲ್ ನರಕ’ಕ್ಕೆ ಬಿದ್ದ ಸಂತ್ರಸ್ತೆಯರ ಸ್ಥಿತಿ ಹೇಗಿರುತ್ತದೆ? ಆಘಾತ, ಅವಮಾನ, ಭಯ. ಯಾರಿಗೆ ಹೇಳಬೇಕು? ಮನೆಯವರು, ಗೆಳೆತಿಯರು, ಸಂಬಂಧಿಕರು ಮತ್ತು ಸಮಾಜದಲ್ಲಿ ಮುಖ ಹೇಗೆ ತೋರಿಸುವುದು? ಯಾರಲ್ಲಿ ಸಹಾಯ ಪಡೆಯುವುದು? ಪೊಲೀಸರ ಬಳಿ ಹೋದರೆ ಅವರೇನು ಮಾಡುತ್ತಾರೆ? ಫೇಸ್ಬುಕ್, ಇನ್‌ಸ್ಟಾಗ್ರಾಂಗೆ ದೂರು ಕೊಟ್ಟರೆ ಅವರು ಕೇಳುತ್ತಾರೆಯೇ? ಈ ಚಿತ್ರಗಳು ಡಿಲೀಟ್ ಆಗುವಷ್ಟರಲ್ಲಿ, ಆಗಬಾರದ್ದು ಆಗಿಹೋಗಿರುತ್ತದೆ. ಲಕ್ಷಾಂತರ ಜನರ ಮೊಬೈಲ್‌ ತಲುಪಿ, ಸಂತ್ರಸ್ತೆಯ ಬದುಕು ಶಾಶ್ವತವಾಗಿ ಕಳಂಕಿತವಾಗಿರುತ್ತದೆ ಹಾಗು ಅವರ ಮತ್ತು ಅವರ ಸಹೋದರ/ಸಹೋದರಿಯರ ಮದುವೆ ಹಾಗು ಸಾಮಾಜಿಕ ಜೀವನದ ಮೇಲೆ ನೇರ ಪರಿಣಾಮ ಬೀರಬಹುದು.
ಇದೇ ಅಸಹಾಯಕತೆಗೆ, ನೋವಿಗೆ ಈಗ ಕೇಂದ್ರ ಸರ್ಕಾರ ಒಂದು ಸ್ಪಷ್ಟವಾದ, ಬಲವಾದ ಪರಿಹಾರ ಮತ್ತು ಕಾಲಮಿತಿಯ ಉತ್ತರವನ್ನು ನೀಡಿದೆ. ಭಾರತದ “ಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮಾಧ್ಯಮ ನೀತಿ ಸಂಹಿತೆ) ನಿಯಮಗಳು, 2021” ರಲ್ಲಿ ಇಂತಹ ಖಾಸಗಿ ಅಥವಾ ಡೀಪ್‌ಫೇಕ್ ಚಿತ್ರ/ವಿಡಿಯೋಗಳನ್ನು ಡಿಲೀಟ್ ಮಾಡಲು ಮತ್ತು ನಿಯಂತ್ರಿಸಲು ಮಧ್ಯವರ್ತಿ ಸಂಸ್ಥೆಗಳ (ಗೂಗಲ್, ಫೇಸ್ಬುಕ್ ಇತ್ಯಾದಿ) ಪಾತ್ರ ಮತ್ತು ಜವಾಬ್ದಾರಿಗಳ ಬಗ್ಗೆ ಉಲ್ಲೇಖವಿದೆ. ಇದೆ ನವೆಂಬರ್ 15 ರಂದು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (MeitY) ಸಮಗ್ರ ಕಾರ್ಯಾಚರಣಾ ಕಾರ್ಯವಿಧಾನ (SOP) ವನ್ನು ಹೊರಡಿಸಿದ್ದು, ದೂರು ಬಂದ 24 ಗಂಟೆಗಳ ಒಳಗೆ ಆನ್‌ಲೈನ್ ಪ್ಲಾಟ್‌ಫಾರ್ಮ್‌ಗಳಿಂದ ಒಮ್ಮತವಿಲ್ಲದ ಖಾಸಗಿ ಚಿತ್ರಗಳನ್ನು ತ್ವರಿತವಾಗಿ ತೆಗೆದುಹಾಕುವುದನ್ನು ಕಡ್ಡಾಯಗೊಳಿಸುತ್ತದೆ ಮತ್ತು ಅದಕ್ಕೆ ಒಂದು ಮಾರ್ಗಸೂಚಿಯನ್ನು ಒದಗಿಸುತ್ತದೆ. ಈ ಉಪಕ್ರಮವು ಜುಲೈ 2025 ರಲ್ಲಿ ಮದ್ರಾಸ್ ಹೈಕೋರ್ಟ್ X v/s ಯೂನಿಯನ್ ಆಫ್ ಇಂಡಿಯಾ ಪ್ರಕರಣದಲ್ಲಿ ನೀಡಿದ ನಿರ್ದೇಶನದಿಂದ ಹುಟ್ಟಿಕೊಂಡಿದೆ, ಅಲ್ಲಿ ನ್ಯಾಯಮೂರ್ತಿ ಎನ್. ಆನಂದ್ ವೆಂಕಟೇಶ್ ಅವರು ಖಾಸಗಿ/ಒಮ್ಮತವಿಲ್ಲದ ಚಿತ್ರಗಳ ಪ್ರಸರಣವನ್ನು ತಡೆಯಲು/ಡಿಲೀಟ್ ಮಾಡಲು ನಿರ್ದೇಶನವನ್ನು ರೂಪಿಸಲು MeitY ಗೆ ಆದೇಶಿಸಿದರು.
ಕೇವಲ 24 ಗಂಟೆಗಳು: ಹೊಸ ನಿಯಮದ ಅಸಲಿ ಶಕ್ತಿ!
ಈ ಹೊಸ SOP ಯ ಅತ್ಯಂತ ಕ್ರಾಂತಿಕಾರಕ ಮತ್ತು ಸಂತ್ರಸ್ತರಿಗೆ ಬಲ ನೀಡುವ ಅಂಶವೆಂದರೆ “24 ಗಂಟೆಗಳ ನಿಯಮ” ಮತ್ತು ಅದೇ ಚಿತ್ರ ಪುನಃ ಮತ್ಯಾವುದೋ ಜಾಲತಾಣದಲ್ಲಿ ಕೆಲವು ದಿನಗಳ ನಂತರ ಪಸರಣವಾಗದಂತೆ ತಡೆಯುವುದು ಆಗಿರುತ್ತದೆ. ಈ 24 ಗಂಟೆಗಳ ಕಾಲಮಿತಿಯನ್ನು ಯಾವುದೇ ಕಂಪನಿ ಉಲ್ಲಂಘಿಸಿದರೆ, ಅದು ಭಾರತದಲ್ಲಿ ತಮ್ಮ ‘ಮಧ್ಯವರ್ತಿ’ ಸ್ಥಾನಕ್ಕೆ ದೊರಕಿರುವ ಕಾನೂನು ರಕ್ಷಣೆಯನ್ನು ಕಳೆದುಕೊಳ್ಳಬೇಕಾಗುತ್ತದೆ. ಇದು ಸಂತ್ರಸ್ತರ ಕೈಗೆ ಕೊಟ್ಟಿರುವ ದೊಡ್ಡ ಅಸ್ತ್ರ. ಇನ್ನು ಮುಂದೆ ಯಾವುದೇ ವ್ಯಕ್ತಿ (ಸಂತ್ರಸ್ತರು) ಅಥವಾ ಅವರ ಪರವಾಗಿ ಯಾರೇ ಆಗಲಿ, ತಮ್ಮ ಖಾಸಗಿ ಚಿತ್ರಗಳು ಅಥವಾ ವಿಡಿಯೋಗಳು ಇಂಟರ್‌ನೆಟ್‌ನಲ್ಲಿದೆ ಎಂದು ದೂರು ಸಲ್ಲಿಸಿದರೆ, ಆ ಪ್ಲಾಟ್‌ಫಾರ್ಮ್ (ಅಂದರೆ ಫೇಸ್ಬುಕ್, ಎಕ್ಸ್, ಇನ್‌ಸ್ಟಾಗ್ರಾಮ್, ಯೂಟ್ಯೂಬ್, ವಾಟ್ಸಾಪ್ ಅಥವಾ ಯಾವುದೇ ವೆಬ್‌ಸೈಟ್) ಆ ದೂರು ಸ್ವೀಕರಿಸಿದ 24 ಗಂಟೆಗಳ ಒಳಗೆ ಆ ಆಕ್ಷೇಪಾರ್ಹ ಕಂಟೆಂಟ್‌ ಅನ್ನು ತೆಗೆದುಹಾಕುವುದು ಅಥವಾ ಅದನ್ನು ನಿಷ್ಕ್ರಿಯಗೊಳಿಸುವುದು ಕಡ್ಡಾಯವಾಗಿದೆ. ಈ ಹಿಂದೆ, ಇಂತಹ ದೂರುಗಳಿಗೆ ಕಂಪನಿಗಳು ಸ್ಪಂದಿಸಲು ವಾರಗಟ್ಟಲೆ, ತಿಂಗಳುಗಟ್ಟಲೆ ಸಮಯ ತೆಗೆದುಕೊಳ್ಳುತ್ತಿದ್ದವು. “ನಾವು ಅಮೇರಿಕಾದ ಕಂಪನಿ, ನಮ್ಮ ನಿಯಮಗಳೇ ಬೇರೆ” ಎಂದು ಸಬೂಬು ಹೇಳುತ್ತಿದ್ದವು. ಅಷ್ಟರಲ್ಲಾಗಲೇ ಆಗಬೇಕಾದ ಹಾನಿ, ಆಗಿಹೋಗಿರುತ್ತಿತ್ತು. ಆದರೆ ಈಗ, ಅವು ಹಾಗೆ ಮಾಡಲು ಆಗುವುದಿಲ್ಲಾ.
ಸಂತ್ರಸ್ತರು ಎಲ್ಲಿ ಮತ್ತು ಹೇಗೆ ದೂರು ನೀಡಬಹುದು?
ಇಂತಹ ಸೈಬರ್ ಅಪರಾಧಕ್ಕೆ ಬಲಿಯಾದ ಸಂತ್ರಸ್ಥರು ಅಥವಾ ಅವರ ಪರವಾಗಿ ಯಾರಾದರು ಸೈಬರ್ ಸಹಾಯವಾಣಿ 1930 ಗೆ ಕರೆ ಮಾಡಿ, ಸೈಬರ್ ಸಹಾಯ ಜಾಲತಾಣ www.cybercrime.gov.in ನಲ್ಲಿ ಅಥವಾ ಸೈಬರ್ ಅಥವಾ ನಿಮ್ಮ ಹತ್ತಿರದ ಪೊಲೀಸ್ ಠಾಣೆಯಲ್ಲಿ ಅಥವಾ ಸರಕಾರ ಸ್ಥಾಪಿಸಿರುವ ಮಹಿಳೆಯರ ಸಹಾಯ ಕೇಂದ್ರದಲ್ಲಿ ಅಥವಾ ಸಹಯೋಗ್ ಜಾಲತಾಣದಲ್ಲಿ ಅಥವಾ ನೇರ ಮಧ್ಯವರ್ತಿ/ಪಸರವಾದ ಸಂಸ್ಥೆಯ ಜಾಲತಾಣದಲ್ಲಿ ದೂರು ನೀಡಬಹುದು.
ಅದು ಪುನಃ ಪಸರಣಕ್ಕೆ ಬರದಂತೆ ತಡೆಯಲು ಸೂಚಿಸಿರುವ ಮಾರ್ಗದರ್ಶಿ ಕ್ರಮಗಳೇನು ?
ದೂರು ನೀಡಲಾದ ನಗ್ನ ಅಥವಾ ಡೀಪ್‌ಫೇಕ್ ಚಿತ್ರ/ವಿಡಿಯೋ ಇಂಟರ್ನೆಟ್‌ನಲ್ಲಿ ಮತ್ತೆ ಮತ್ತೆ ಬರುವುದನ್ನು ತಡೆಯಲು, ‘ಹ್ಯಾಶ್-ಮ್ಯಾಚಿಂಗ್’ ಎಂಬ ವಿಶೇಷ ತಂತ್ರಜ್ಞಾನವನ್ನು ಬಳಸಲು ನಿರ್ದೇಶಿಸಲಾಗಿದೆ. ಇದಕ್ಕಾಗಿ, ನಮ್ಮ ಗೃಹ ಸಚಿವಾಲಯದ ಅಡಿಯಲ್ಲಿರುವ ‘ಭಾರತೀಯ ಸೈಬರ್ ಕ್ರೈಮ್ ಕೋಆರ್ಡಿನೇಷನ್ ಸೆಂಟರ್’ (I4C) ಸಂಸ್ಥೆಯು, ದೂರು ನೀಡಿದ ಎಲ್ಲಾ ಚಿತ್ರ/ವಿಡಿಯೋಗಳ ಹ್ಯಾಷ್ ಅನ್ನು ಪಟ್ಟಿಮಾಡಬೇಕು (ಇದನ್ನು ‘ಹ್ಯಾಶ್ ಬ್ಯಾಂಕ್’ ಎನ್ನುತ್ತಾರೆ). ಒಂದು ವೇಳೆ, ಯಾರಾದರೂ ಈ ಕೆಟ್ಟ ವಿಷಯವನ್ನು ಬೇರೆ ಹೊಸ ಲಿಂಕ್ (URL) ಬಳಸಿ ಮತ್ತೆ ಅಪ್‌ಲೋಡ್ ಮಾಡಲು ಪ್ರಯತ್ನಿಸಿದರೆ, ಈ ತಂತ್ರಜ್ಞಾನವು ಅದನ್ನು ತಕ್ಷಣವೇ ಹ್ಯಾಷ್ ಬ್ಯಾಂಕ್ ನೊಂದಿಗೆ ತಾಳೆ ಹಾಕಿ ಗುರುತಿಸಿ, ತಡೆಯಬೇಕು. ಇದಲ್ಲದೆ I4C ಸಂಸ್ಥೆಯು ಅಂತರ್ಜಾಲವನ್ನು ನಿರಂತರವಾಗಿ ದೂರು ನೀಡಿದ ಚಿತ್ರ/ವಿಡಿಯೋಗಳಿಗಾಗಿ ಶೋಧಿಸುವ ತಂತ್ರಜ್ಞಾನವನ್ನು ಅಭಿವೃದ್ದಿಪಡಿಸಿ ಅದನ್ನು ಶೀಘ್ರದಲ್ಲೇ ಚಾಲನೆಗೆ ತರುವಂತೆ ಸೂಚಿಸಲಾಗಿದೆ. ದೂರಸಂಪರ್ಕ ಇಲಾಖೆ (DoT), ಇಂಟರ್ನೆಟ್ ಸೇವೆ ಒದಗಿಸುವ ಕಂಪನಿಗಳ (ISP) ಜೊತೆ ಸೇರಿ, ಈ ಕೆಟ್ಟ ಲಿಂಕ್‌ಗಳು ಜನರಿಗೆ ಸಿಗದಂತೆ ನೋಡಿಕೊಳ್ಳಬೇಕು. ಕೊನೆಯದಾಗಿ, ಗೂಗಲ್‌ನಂತಹ ಸರ್ಚ್ ಇಂಜಿನ್‌ಗಳು ಕೂಡ, ಈ ಆಕ್ಷೇಪಾರ್ಹ ವಿಷಯವನ್ನು ತಮ್ಮ ಹುಡುಕಾಟದ ಫಲಿತಾಂಶಗಳಿಂದ ತೆಗೆದುಹಾಕಬೇಕು. ಈ ಮಾರ್ಗದರ್ಶಿಯ ಪ್ರಕಾರ ಎಲ್ಲಾ ಇಲಾಖೆಗಳು (MeitY, ಗೃಹ ಸಚಿವಾಲಯ, ದೂರಸಂಪರ್ಕ ಇಲಾಖೆ) ಒಟ್ಟಾಗಿ ಕೆಲಸ ಮಾಡಬೇಕಾಗುತ್ತದೆ ಮತ್ತು ಒಂದು ವೇಳೆ ದೂರಿಗೆ ಒಳಪಟ್ಟ ಚಿತ್ರ/ವಿಡಿಯೋಗಳು ವಿದೇಶಿ ವೆಬ್‌ಸೈಟ್‌ನಲ್ಲಿದ್ದರೆ, ಭಾರತದಲ್ಲಿ ಆ ವೆಬ್‌ಸೈಟನ್ನೇ ಬ್ಲಾಕ್ ಮಾಡುವ ಅಧಿಕಾರವೂ ಇರುತ್ತದೆ.
ಮಧ್ಯವರ್ತಿ ಸಂಸ್ಥೆಗಳು ಡಿಲೀಟ್ ಮಾಡದಿದ್ದರೆ ನೀವು ಹೇಗೆ ಅದರ ಬಗ್ಗೆ ಎಲ್ಲಿ ದೂರು ನೀಡಬಹುದು ?
ದೂರುದಾರರು ನಿಗದಿತ ಸಮಯದೊಳಗೆ ಮಧ್ಯವರ್ತಿಯ ಸಂಸ್ಥೆಯ ಕುಂದುಕೊರತೆ ಅಧಿಕಾರಿಯಿಂದ ಯಾವುದೇ ಪ್ರತಿಕ್ರಿಯೆಯನ್ನು ಪಡೆಯದಿದ್ದರೆ ಅಥವಾ ಕುಂದುಕೊರತೆ ಅಧಿಕಾರಿ ನೀಡಿದ ಪರಿಹಾರದ ಬಗ್ಗೆ ಅತೃಪ್ತರಾಗಿದ್ದರೆ, ದೂರುದಾರರು ಅಂತಹ ಮಧ್ಯವರ್ತಿಯ ಸಂಸ್ಥೆಯ ನಿರ್ಧಾರದ ವಿರುದ್ಧ ಅಥವಾ ಅನ್ವಯವಾಗುವ ಸಮಯದೊಳಗೆ ಕಾರ್ಯನಿರ್ವಹಿಸಲು ವಿಫಲವಾದ ಮಧ್ಯವರ್ತಿಯ ಸಂಸ್ಥೆಯ ವಿರುದ್ಧ ಐಟಿ ನಿಯಮಗಳು 2021 ರ ನಿಯಮ 3A ಅಡಿಯಲ್ಲಿ ಸ್ಥಾಪಿಸಲಾದ ಕುಂದುಕೊರತೆ ಮೇಲ್ಮನವಿ ಸಮಿತಿ (ಮೇಲ್ಮನವಿ ಸಲ್ಲಿಸಲು URL “www.gac.gov.in”) ಮುಂದೆ ಮೇಲ್ಮನವಿ ಸಲ್ಲಿಸಬಹುದು. ಹಾಗು ಅಲ್ಲೂ ನಿಮಗೆ ಪರಿಹಾರ ದೊರಕದಿದ್ದರೆ ದೂರುದಾರರು ಭಾರತೀಯ ನ್ಯಾಯ ಸಂಹಿತಾದ ಸೆಕ್ಷನ್ 77(Voyeurism) ಮತ್ತು ಭಾರತೀಯ ತಂತ್ರಜ್ಞಾನ ಆಕ್ಟ್ ನ ಸೆಕ್ಷನ್ 66E (ಗೌಪ್ಯತಾ ಉಲ್ಲಂಘನೆ) ಅಡಿಯಲ್ಲಿ ನೀವು ಅಂತಹ ಸಂಸ್ಥೆಗಳ ವಿರುದ್ಧ ಭಾರತೀಯ ನ್ಯಾಯಾಲಯದಲ್ಲಿ ದಾವೆ ಹೂಡಬಹುದು.
ಯಾವ ರೀತಿಯ ಚಿತ್ರ/ವಿಡಿಯೋಗಳ ಮೇಲೆ ಈ ಮಾರ್ಗದರ್ಶಿ ಸೂತ್ರಗಳು ಅನ್ವಯಿಸುತ್ತದೆ ?
- MeitY ಹೊರಡಿಸಿರುವ ಮಾರ್ಗದರ್ಶಿ ನಿಯಮಗಳು ಕೆಳಗೆ ಸೂಚಿಸಿರುವ ಚಿತ್ರ/ವಿಡಿಯೋಗಳ ಮಾದರಿಗಳ ಮೇಲೆ ಅನ್ವಯಿಸುತ್ತದೆ:
- ಮಾಜಿ ಪ್ರಿಯತಮ/ಗಂಡ/ವ್ಯಕ್ತಿ ಹಂಚಿಕೊಂಡ ಖಾಸಗಿ ಫೋಟೋಗಳು/ವಿಡಿಯೋಗಳು
- ಸೋಶಿಯಲ್ ಮೀಡಿಯಾ ಮತ್ತು ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಮಾರ್ಫ್ ಮಾಡಿದ ಚಿತ್ರಗಳು/ವಿಡಿಯೋಗಳು
- ತೆರೆಮರೆಯಿಂದ ಅಥವಾ ಸಿಸಿಟಿವಿ ಇಂದ ಕಳ್ಳ ಮಾರ್ಗದಲ್ಲಿ ಸೆರೆಹಿಡಿದ ಚಿತ್ರಗಳು/ವಿಡಿಯೋಗಳು
- ಸಾಮಾಜಿಕ ಮಾಧ್ಯಮದಲ್ಲಿ ಅಥವಾ ವಯಸ್ಕ/ಅಶ್ಲೀಲ ವೆಬ್‌ಸೈಟ್‌ಗಳಲ್ಲಿ ಅಪ್‌ಲೋಡ್ ಮಾಡಲಾದ ರಿವೆಂಜ್ ಪೋರ್ನ್ ಚಿತ್ರಗಳು/ವಿಡಿಯೋಗಳು
- ಡೀಪ್‌ಫೇಕ್ ಲೈಂಗಿಕ ಚಿತ್ರ/ವೀಡಿಯೊಗಳು
- ಸೋರಿಕೆಯಾದ ಕ್ಲೌಡ್ ಸ್ಟೋರೇಜ್ ಖಾಸಗಿ ಚಿತ್ರಗಳು/ವೀಡಿಯೊಗಳು
ಕೊನೆಯ ಮಾತು :
ಈ ಹೊಸ SOP, ಡಿಜಿಟಲ್ ಜಗತ್ತಿನಲ್ಲಿ ಸೆಕ್ಸ್‌ಟಾರ್ಶನ್/ಬ್ಲ್ಯಾಕ್‌ಮೇಲ್, ನಿಂದನೆ, ಲೈಂಗಿಕ ಸುಲಿಗೆ ಮತ್ತು ಶೋಷಣೆಗೆ ಒಳಗಾಗುತ್ತಿರುವ ಅಸಂಖ್ಯಾತ ಸಂತ್ರಸ್ತರಿಗೆ, ವಿಶೇಷವಾಗಿ ಮಹಿಳೆಯರಿಗೆ ಒಂದು ದೊಡ್ಡ ಭರವಸೆಯ ಬೆಳಕಾಗಿದೆ. “ನಾಲ್ಕು ಜನ ಏನು ಹೇಳುತ್ತಾರೋ” ಎಂಬ ಭಯದಿಂದ ಮೌನವಾಗಿರಬೇಡಿ. ಆ ಮೌನವೇ ಅಪರಾಧಿಯ ಅತಿ ದೊಡ್ಡ ಅಸ್ತ್ರ. ನಿಮ್ಮದಲ್ಲದ ತಪ್ಪಿಗೆ ನೀವು ತಲೆತಗ್ಗಿಸುವ ಅಗತ್ಯವಿಲ್ಲ. ಯಾರಾದರೂ ನಿಮ್ಮ ಖಾಸಗಿ ಚಿತ್ರಗಳನ್ನು ಇಟ್ಟುಕೊಂಡು ಬೆದರಿಕೆ ಹಾಕಿದರೆ, ಅಥವಾ ಎಲ್ಲಾದರೂ ಅದು ಪ್ರಕಟವಾಗಿದ್ದರೆ, ಒಂದು ಕ್ಷಣವೂ ತಡ ಮಾಡಬೇಡಿ, ಕೂಡಲೇ ದೂರು ನೀಡಿ. ಈ ’24 ಗಂಟೆಗಳ ರಕ್ಷಾಕವಚ’ ಈಗ ನಿಮ್ಮ ಜೊತೆಗಿದೆ. ಇದನ್ನು ಬಳಸಿ, ನಿಮ್ಮ ಘನತೆಯನ್ನು ರಕ್ಷಿಸಿಕೊಳ್ಳಿ. ಈ ಮಾಹಿತಿಯನ್ನು ನಿಮ್ಮ ಸುತ್ತಮುತ್ತಲಿನ ಪ್ರತಿಯೊಬ್ಬರಿಗೂ, ವಿಶೇಷವಾಗಿ ಹೆಣ್ಣುಮಕ್ಕಳಿಗೆ ತಲುಪಿಸಿ. ಅರಿವೇ ರಕ್ಷಣೆ.
